Ondersteun die PRG Kunstuin en Koffiewinkel
Op Vrydag ,21 Oktober, het Paul Roos Gimnasium saam met IS Art Gallery en Absa – die Paul Roos Kunstuin se deure geopen.
Die PRG Kunstuin en -koffiewinkel is ‘n opwipuitstalling wat beeldhouwerke van plaaslike beeldhouers ten toon stel. Kunsversamelaars en –liefhebbers, met ‘n voorliefde vir beeldhouwerk en tuinkuns, word uitgenooi om die uitstalling by Markötter Sportkompleks in Stellenbosch te besoek.
Die uitstalling is van Saterdag, 22 Oktober tot Sondag, 30 Oktober oop vir die publiek. Van klein tot lewensgrootte beelde deur onder andere Cornelia Stoop, Wilma Cruise, Noria Mabasa, Robin Kitinyo, Egon Tania, Strijdom van der Merwe, Maritza Breytenbach, Arno Morland en ander word uitgestal.
PRG se kunsuitstalling gaan ook gepaard met ‘n jeuguitreikprojek wat deur die Rupert Museum ondersteun word. Leerders vanuit die Stellenbosch gemeenskap het ‘n werkswinkel saam met kunstenaar Heath Nash en sy span uit Langa bygewoon. By die werkswinkel het die leerders geleer hoe om kunswerke met gebruikte melkbottels te maak en drie pragtige dekoratiewe muurpanele is geskep wat ook by die uitstalling te koop is. ‘n Gedeelte van opbrengste uit kunsverkope word aan die Borg-‘n-Paul-Rooser hulpfonds toegewys wat ondersteuning aan behoeftige leerders binne die Paul Roos gemeenskap bied.
Uitstallingsure: Maandag (24 Oktober) tot Saterdag (29 Oktober): 10:00-16:00. Sondag (30 Oktober): 09:00-14:00.
Vir navrae, kontak Luna Paige by media@paulroos.co.za.
PRG Art Garden Catalogue
PRG ART GARDEN CATALOGUE_final_with prices
